Waa maalin khamiis ah. Xamse waxa uu ka yimi iskulkii.
Maalmaha khamiisaha ah, aadbuu lugta ugu xadaa tallaabada, haddaanuu marmarka
qaar ordinba. Meel kale kuma leexdee qummaati ayuu u abbaaraa malcaamaddiisii
maalintaa. Oo tolow maalmaha kale laguma karo tag ee, maalintan maxaa loogu
sheegaa?! Haa dee, waa kahmiis oo ma waxaanuu u ordinba malcaamadda. Maalinta
sabtida oo loo asteeyay inay tahay maalin qooqan iyo maalmaha la jaarka ahi,
isaga uma tirsana. Labada saacadood ee khamiistu, iyagaa sameeya isbuuca dhan
farxaddiisa. Waaka soogalay qolkii dabadda xigay ee, kabaha kadinka ku siibay isaga
oo si u neeftuuraya. Haa wa khamiis ay innamada iyo habluhu su’aalo isku
hurgufaan.
La isku bilaw, oo Xamse ha waydiiso hablaha, kumuu
ahaa saxaabigii Dejaal-cawar soo arkay. Heblaayo ay si gaara isha isugu xadaani,
waajib ha isaga dhigto ka jawaabidda su’aashiisa. Dee waa hebel. Ma’aha. Waa hebel
haddaba. Dee maaha. Intay yar xanaaqdo, intii aanay fadhiisan ha sii raaciso gunuus
ah, haddaa maadiguu ahaa. Xamse ha ugu sii daro, oo ma saxaabi ayaan ahay anigu?
Macalinkii dhexdhexaadiyaha ahaa, ma yidhi 3 derajo ayaa idinka go’an. Xamse ha
sheego inaanay mudnayn, in laga goosto maadama ay soo gaadhayaan habluhu. Se dhegba
looma dhigin. Waa yaab ee, ardayduba way faraxsanyihiin! Farxaddani kama
muuqato wiigga dhan ee wax la dhiganayo, marka laga reebo labadan saacadood ee
su’aalaha ah. Isma waydiiyaan macalimiintu, wax ardayda dareenkooda badalay.
Waalidkana daaba middaa. Waxaabay nafisaan inta ay ka
maqanyihiin. Cajiib! Maalmaha quraanka lagabaxayo; laxidhiidhinayo ama dareeriska
lasoo diyaariyo, labadan saacadoodi uga mudan ardayda. Xamse oo ka sheekaynaya
20 sano kadib malcamaddiisii, waxa uu aalaba ku tiiqtiiqsadaa khamiisihii malcaamadda.
Ardayda waa lagu dilaa quraanka inay soo qaybaan, oo waa amar aanay iyaguna
raali ka ahayn. Se khamista kaliya waxa loo sheegaa in su’aalo la ridanayo. Ardaydaasina
meelwalba waxay u maraan si ay su’aalo usoo helilahaayee. Qaarbaaba waajib
isaga dhiga xifdintooda, si ay u jabiyaan su’aalaha dhufayska kusoo jira. Maadaama
aan la ogolayn in warqadaha lala soo baxo. Awal in wax la xifdiyo maanu macallinku
ku dili jirin? Mooji, see dee ma wax aan la xifdinbaa, waa wax ay diyaar u
yihiin oo doonayaan ee.
Maalmaha loo sheego in aan su’aalo jirin, murugo iyo
walbahaar ayaa ardayda ka muuqda. Gelinka danbe bareefadka ayuu dhigtaa Xamse,
oo waxa uu dhammaynayaa dugsigii dhexe. Maalinta arbacadu waa u khamiista
malcaamadda oo maba jaro. Waa laba maaddo oo isasaran. Ingiriisada iyo carabida
oo lagu tartamayo baraatiis iyo xiwaar. Maalintaa ardaydu niyad ahaan way fahmayaan,
in wax samuuradda loogu xariiqaayi, inay ka mudantahay inay is tijaabiyaan. Meel
halkana kursigaagii ku noqo iyo waa maxay farxiqa u dhaxeeya Soomaaliland iyo
Soomaaliya ayaa ka dhacaysa. Xamaasadda ayaa sii korodha arbaca kasta, oo
waxoogaa ayaa la soo xifdiyaa. Se intaasi way u dhaantaa samuuradda labuuxiyo,
ee aanay badanka waxba ka fahmin. Xamse oo waynaaday ayaa ka sheekaynaya,
dhallaanimadu inay tahay marxaalad ka gooniya da’da inteeda kale. Sababtoo ah, korriin
caqli iyo mid jidheed ayuu ilmuhu ku jiraa. Carruurtuna inay gacan waalid iyo
mid macallinba helaani ay waa jibtahay. Si mustaqbalka uu usoo baxo, ilmo dareenkiisa
caqli iyo kiisa caadifadeedi is celinayaan. Isaga oo hadalka soo gabagabaynaya
ayuu sii raaciyay, Ma’aha inaynu riyooyinkooda ku dhexdilno, muuqaalka quruxda
badan ee dhallaanimadooda.
